सहोदरांशी संवाद

मी सिद्धहस्त लेखक नाही. शिक्षणाने मी सिव्हिल इंजिनीअर आहे आणि पेशाने बिल्डर. डायरी नियमित लिहिण्याची मला गेल्या अनेक वर्षांपासून सवय आहे आणि माझे वडील, आजोबा आणि खापर पणजोबा हे प्रतिभावंत, प्रज्ञावंत होते अशी ‘डीएनए’ तून आलेली पुण्याई आणि डायरी लिहिण्यातून झालेली सवय यामुळे मी लिहिण्याचं साहस करू शकतो.

‘सहोदर’ हा शब्द मला खूप आवडतो. विग्रह केला तर सह + उदर म्हणजे एका उदरातून जन्माला आलेले म्हणजेच भाऊ असा याचा खरं तर अर्थ आहे. पण एका उदरातून जन्माला न येताही आपल्या सारखाच विचार करणारे, एकाच भावनेवर धडकणारे, असं सहकंपायमान अस्तित्व असलेले काही लोक आपल्याला आयुष्यात भेटत असतात. त्यांच्याशी आपली ‘वेव्हलेन्थ’ जुळते असे आपण म्हणत असतो. अशांनाच मी सहोदर समजतो.

जगण्याची, जगाची आणि जीवनाची मला प्रचंड उत्सुकता आहे. जगायला मिळालेल्या प्रत्येक क्षणात आकंठ बुडून तो क्षण जगता यावा याचा मी प्रयत्न करत असतो. घालवलेला ‘क्वालिटी टाइम’ व मिळवलेलं ‘उन्नयन’ हेच प्रत्येक दिवसाचं, वर्षाचं, आयुष्याचं सार्थक मोजण्याचे मापदंड आहेत अशी माझी ठाम धरणा आहे. असं जगण्यात जे काही भावतं, सापडतं ते लिहिण्याचा मी प्रयत्न करत असतो.

या  ब्लॉगच्या मार्फत ते आपल्यापर्यंत पोचावं, सहकंपित सहोदरांशी संवाद साधला जावा, या संवादातून एक मैत्रकुळ, सहोदरांचा समूह व्हावा व पुढचं आयुष्य या समूहासोबत शेअर करत करत जगावं हा या ब्लॉगचा उद्देश आहे